امام زید ابن امام علی زین العابدین عیلہماالسلام
( ۲۱ ویں اور آخری قسط )
امام اعظم ابو حنیفہ رضی اللہ عنہ پوشیدہ طور پر فتوی دیتے تھے
کہ امام زید علیہ السلام کی مدد کرنا واجب ہے
ان کی مالی امداد کرنا واجب ہے
اور ان کے ساتھ اس شخص کے خلاف خروج کرنا واجب ہے جو
دزد ( نیم شب اور قزاق نصف النہار ) ہے اور حکومت پر بزور قابض ہو گیا ہے نیز بطور نام امام و خلیفہ ہے
ایک عورت نے امام اعظم ابو حنیفہ رضی اللہ عنہ سے کہا !
آپ نے امام ابراھیم اور امام محمد نفس زکیہ ( ابنا عبداللہ المحض ابن حسن ابن حسن ابن علی ابن ابی طالب علیہم السلام ) کے ساتھ خروج کا میرے بیٹے کو حکم دیا حتی کہ وہ شہید ہو گیا ، اس پر امام اعظم ابوحنیفہ نے فرمایا ! کاش ! تمہارے بیٹے کی جگہ میں ( شہید ) ہوتا
آپ عباسی خلیفہ منصور اور اس کے امثال کے متعلق فرماتے تھے !
اگر یہ لوگ تعمیر مسجد کا ارادہ کریں اور اس کی اینٹ کا تخمینہ کی مجھے ترغیب دیں ، تو یقیناً میں ( اس کام کو ) نہیں کروں گا ( ۵۰ )
خلیفہ ابوجعفر منصور نے امام اعظم ابو حنیفہ رضی اللہ عنہ کو کوفہ سے بغداد منتقل کرکے آپ کو عہدۂ قضا دینا چاہا ، لیکن آپ نے لینے سے انکار کردیا ، اس پر منصور نے قسم کھائی کہ آپ کو بالضرور ( عہدۂ قضا ) قبول کرنا ہے ، پھر امام اعظم ابو حنیفہ نے بھی قسم کھائی کہ میں ( عہدۂ قضا ) قبول نہیں کروں گا ، تو امام ابو حنیفہ کے دربان رفیع ابن یونس نے آپ سے کہا ! کیا آپ غور نہیں کرتے ؟ کہ امیرالمومنین ( منصور ) قسم کھا رہا ہے !!
امام ابو حنیفہ نے ( جواب میں ) فرمایا ! امیرالمؤمنین اپنی قسم کا کفارہ ( ادا کرنے ) پر مجھ سے زیادہ قادر ہے ،
پس منصور نے آپ کو قید کرنے کا آرڈر جاری کردیا ، پھر بھی آپ نے عہدۂ قضا قبول نہیں کیا ، اس پر منصور نے آپ کو سو کوڑے مارے اور آپ محبوس رہے حتی کہ جیل ہی میں انتقال ہو گیا ( ۵۱ )
( یہ بھی بیان کیا گیا ہے کہ ) امام اعظم ابو حنیفہ ، امام محمد نفس زکیہ ابن عبداللہ المحض ابن حسن ابن حسن ابن علی ابن ابی طالب علیہم السلام سے بیعت تھے اور آپ کے پیروان ( خاص ) میں تھے حتی کہ خلیفہ عباسی منصور کو یہ خبر ہوئی تو اس نے آپ کو ہمیشہ کے لئے قید خانہ میں ڈال دیا اور جیل ہی میں آپ کی وفات ہوئی
اور یہ بھی کہا گیا ہے کہ آپ نے منصور کے ایام خلافت میں امام محمد نفس زکیہ سے بیعت کی اور مدینہ طیبہ میں امام محمد نفس زکیہ جب شہید ہو گئے ، تو اہل بیت کرام سے موالات کا عقیدہ رکھتے ہوے آپ کی بیعت پر قائم و دائم رہے ، آپ کی ( اہل بیت سے ) یہ کیفیت شیفتگی منصور کو پہونچی تو اس نے آپ کا کام تمام کردیا ( ۵۲ )
اور کہا گیا ہے کہ اس میں کوئی شک نہیں کہ منصور نے آپ کو زہر دیا ، جس کی وجہ سے آپ کی شہادت واقع ہوئی ،
آپ ابراہیم ابن عبداللہ المحض ابن حسن ابن حسن ابن علی ابن ابی طالب علیہم السلام کے ساتھ ( ڈٹ کر ) کھڑے رہے ، اس وجہ سے منصور نے آپ کو زہر دے دیا ( ۵۳ )
حافظ ابوالحسن ابن حسین السختیانی الشافعی ، ابو حسان الزیادی سے روایت کرتے ہیں کہ انہوں نے فرمایا ! کہ امام اعظم ابو حیفہ علیہ الرحمہ و الرضوان کو جب موت کا احساس ہوا ، تو اپنی جبین نیاز سجدہ میں رکھ دی اور حالت سجدہ ہی میں آپ کی روح قالب خاکی سے پرواز کر گئی ( ۵۴ )
نوٹ:۔۔ عہدۂ قضا تو اک بہانہ تھا ، آپ کی شہادت کی بنیادی وجہ تو آل النبی سے آپ کی والہانہ اور فدائیانہ محبت تھی۔ ( سلام اللہ علیہم )
امام اعظم ابو حنیفہ رضی اللہ عنہ کے شیوخ اہل بیت مذکور الذیل ہیں۔
( ۱ ) محمد الباقر ابن علی زین العابدین ابن حسین ابن علی ابن ابی طالب
( ۲ ) زید ابن علی ابن علی زین العابدین ابن حسین ابن علی ابن ابی طالب
( ۳ ) جعفر الصادق ابن محمد الباقر ابن علی زین العابدین ابن حسین ابن علی ابن ابی طالب
( ۴ ) حسن ابن حسن ابن حسن ابن علی ابن ابی طالب
( ۵ ) عبداللہ المحض ابن حسن ابن حسن ابن علی ابن ابی طالب
( ۶ ) عبداللہ ابن علی زین العابدین ابن حسین ابن علی ابن ابی طالب
( ۷ ) حسن ابن زید ابن حسن ابن علی ابن ابی طالب ، ابو محمد المدنی
( ۸ ) حسن ابن محمد ابن علی ابن ابی طالب الھاشمی المدنی ، ابو محمد ، وابوہ ھو ابن الحنفیہ۔ ( علیہم السلام )
( ۵۰ ) نور الابصار فی مناقب آل بیت النبی المختار للشیخ السید مؤمن ابن حسن مؤمن الشبلنجی ص ۴۳۲
( ۵۱ ) نور الابصار ص ۴۳۱
( ۵۲ ) الملل و النحل للامام ابی الفتح محمد بن عبدالکریم الشھرستانی المتوفی ۵۴۷ھ ص ۱۵۷
( ۵۳ ) مرات الجنان و عبرت الیقظان للامام ابی محمد عبداللہ بن اسعد بن علی بن سلیمان الیافعی الیمنی المکی المتوفی ۷۶۸ھ ج ۱ ص ۲۴۲
( ۵۴ ) مناقب الامام الاعظم رضی اللہ عنہ للامام الشیخ حافظ الدین محمد بن محمد بن شھاب المعروف بابن البزاز الکردری الحنفی المتوفی ۸۲۷ھ ج ۲ ص ۲۲محتاعبدالعزیز ندو@ منقول
No comments:
Post a Comment